القاهرة السينمائي 38- صورة.. أحمد داود من تقليد عبدالحليم في 2003 للسير على السجادة الحمراء 2016

للممثل أحمد داود ذكريات خاصة مع مهرجان القاهرة السينمائي الدولي رغم أنه هذا العام يشارك لأول مرة فيه ويسير على السجادة الحمراء كممثل كما يشارك بفيلم في المسابقة الرسمية.

وكشف داود أنه سبق وشارك في المهرجان وتحديدا عام 2003 في الدورة الـ 27، وهذه المشاركة عزيزة على قلبه ولا يمكن أن ينساها أبدا.

وعبر حسابه في موقع Instagram نشر صورة لأشياء كتبها وقت مشاركته في هذه الدروة، كما حكى عن هذه المشاركة وكيف جاءت وماذا فعل وقتها.

وقال داود إنه كان في هذا الوقت لا توجد فرصة للتمثيل سوى في مسرح الجامعة، ولكن لطموحه الكبير كان يشارك في مسارح النقابات ومسارح الدولة، ومن خلال إحدى التجارب التي شارك فيها وكانت من إخراج عمرو قابيل، عرف أنه معروض عليه المشاركة في مهرجان القاهرة.

وتابع ليحكي أن مشاركته كانت من خلال أن يرتدي ماسك على شكل شخصية فنية ليستقبل ضيوف المهرجان، وكان يرتدي ماسك على شكل العندليب الأسمر عبد الحليم حافظ، وكان يشاهد الممثلين وهم يدخلون على السجادة الحمراء، وبالطبع تدرب وتمرن ليسير بطريقة العندليب ويقلد حركاته.

وأختتم كلامه بأنه هذا العام يشارك لأول مرة ولديه 4 أفلام سيتم عرضها، واحد في المسابقة الرسمية وهو "يوم للستات"، و"قبل زحمة الصيف"، "هيبتا: المحاضرة الأاخيرة"، "الماء والخضرة والوجه الحسن"، وأن هذه الذكريات تزيد ثقة الإنسان في نفسه وترفع سقف طموحاته.

"ماسك العندليب" في مهرجان القاهرة ال ٢٧ كانت عندي مشاركة ضمن فعليات المهرجان بحبها جدا وعمري ما هنساها وكانت في حفل الأفتتاح وحفل الختام في الفترة من ٧-١٧ أكتوبر من عام ٢٠٠٣. كان وقتها مفيش اي مجال للتمثيل غير مسرح الجامعة بس وده مكنش كفاية بالنسبة لي وكان عندي طموح ونفسي امثل واخرج بره مسرح الجامعة وانطلق لعبت حاجات كتيير في مسارح النوادي ومسارح النقابات ومسارح الدولة ومن خلال تجربة من التجارب كان بيخرجها المخرج المسرحي عمروقابيل عرفت اني معروض عليا المشاركة في المهرجان السنة دي الله مهرجان السينما .. بجد والنبي .. طبعا معاكوا وكان وقتها ادارة المهرجان بتعمل حاجة لذيذة جدا ماسكات كبيرة لكل الشخصيات السينمائية المصرية فاكر كان في ماسكات نجيب الريحاني وعبدالسلام النابلسي وزينات صدقي وإسماعيل ياسين وعبدالحليم حافظ ويوسف وهبي وعبدالمنعم ابراهيم يعني دول اللي فاكرهم وكان كل المطلوب تلبس ملابس الشخصية وتلبس الماسك والشخصيات دي هي اللي بتستقبل ضيوف المهرجان نفس فكرة الشخصيات الكرتونية دلوقتي اللي بيكونوا موجودين في أعياد ميلاد للأطفال . وانا كنت العندليب اتمرنت عشان امشي نفس مشيته وهزت دماغه وكنت متحمس جدا ومبسوط اني هستقبل كل النجوم اللي نفسي ابقي زيهم في يوم من الأيام واللي عمره مالبس ماسك اكيد مش هيبقي عارف ان الشخص اللي لابس الماسك بيشوف من فتحة صغيرة كده غالبا بتبقي في بق الماسك طبعا العندليب هو اللي استقبل كل الضيوف اليوم ده وشفت كل النجوم اللي انا بحبهم علي الحقيقة من بق العندليب . السنة دي انا اول مرة اروح المهرجان وعندي فيلم في المسابقة الرسمية و٣ أفلام بيتعرضوا في المهرجان صباح الذكريات الحلوة اللي تخليك تقول الحمد لله وتزود ثقتك في نفسك وترفع من سقف طموحك .. صباح الفل

A photo posted by Ahmed Dawood - أحمد داود🔵 (@oodawoodoo) on Nov 16, 2016 at 9:00pm PST

وانطلقت فعاليات مهرجان القاهرة السينمائي الدولي يوم الثلاثاء، 15 نوفمبر الجاري، وتستمر حتى 24 من نفس الشهر.

اشترك فى النشرة البريدية لتحصل على اهم الاخبار بمجرد نشرها

إبحث فى الموقع